Чаму зьменшыўся міграцыйны паток у бок Польшчы і Літвы, але павялічыўся — у бок Латвіі?

За першыя два тыдні лістапада Польская памежная служба зафіксавала 328 выпадкаў нелегальнага перасячэньня мяжы з боку Беларусі. Гэта — найменшая колькасьць парушэньняў мяжы за першую палову месяца, пачынаючы зь сёлетняй вясны.

Таксама для параўнаньня: у лістападзе 2022 году было зафіксавана больш за 2000 парушэньняў мяжы Польшчы з боку Беларусі, у лістападзе 2023 году — каля 1500, у лістападзе летась — каля 1000.

17 лістапада сёлета Польская памежная служба не зафіксавала ніводнага нелегальнага перасячэньня мяжы з боку Беларусі.

Стабілізацыю сытуацыі на мяжы зь Беларусьсю канстатавала і МУС Польшчы.

«Усяго некалькі тыдняў таму рэгістравалася да 100 спробаў парушэньняў у дзень. Цяпер часьцей за ўсё гэта некалькі спробаў у дзень або дзясяткі спробаў», — паведаміла польскае Міністэрства ўнутраных спраў.

У сваю чаргу літоўская памежная служба за два тыдні лістапада не зафіксавала ніводнага нелегальнага перасячэньня мяжы з боку Беларусі.

Пры гэтым памежнікі Латвіі зафіксавалі за 14 дзён лістапада 430 спробаў нелегальнага перасячэньня мяжы з боку Беларусі, за два тыдні лістапада летась беларуска-латвійскую мяжу спрабавалі нелегальна перасекчы 190 парушальнікаў.

Гэтыя лічбы каментуе былы дыплямат, аналітык Цэнтру новых ідэяў Павел Мацукевіч.

— Я думаю, што надвор’е можа ўплываць на колькасьць спробаў мігрантаў штурмаваць межы, у халодную пару года гэтая колькасьць зьніжаецца. Але мяркую, што ў дадзеным выпадку істотны ўплыў аказвае і палітычны «клімат», дынаміка адносінаў з Польшчай і Літвой.

Улады Беларусі на працягу некалькіх гадоў заяўляюць, што яны зьнялі зь сябе абавязаньні спыняць спробы нелегальных перасячэньняў межаў Беларусі з краінамі Эўразьвязу. Але ў асобных выпадках яны ўсё ж такі вяртаюцца да выкананьня сваіх абавязаньняў, хаця, як бачым, часова і выбарачна.

— А чым абумоўлены выбар? Польшча робіць крокі насустрач Менску, адчыняе памежныя пераходы. Зь Літвой — востры канфлікт. Але міграцыйны паток зьнізіўся ў абедзьве гэтыя краіны. І пры гэтым ён павялічыўся празь мяжу з Латвіяй, зь якой няма ні канфлікту, ні крокаў насустрач.

— З Польшчай, сапраўды, матывацыя зразумелая. У Літвы Менск намацаў ахілесаву пяту, заблякаваўшы выезд літоўскіх грузавікоў. І мы бачым, што гэты канфлікт уступіў у перамоўную фазу. Сёньня адбываюцца беларуска-літоўскія перамовы на ўзроўні намесьнікаў кіраўнікоў памежных службаў.

І я думаю, што ў залежнасьці ад таго, у які бок схіліцца палітычны ківач, колькасьць спробаў незаконных перасячэньняў літоўскай мяжы альбо рэзка павялічыцца, альбо застанецца на нізкім узроўні.

Што тычыцца Латвіі, то варта заўважыць, што на тэрыторыі Беларусі прысутнічае немалая колькасьць замежных грамадзян, мэта якіх — трапіць празь Беларусь у краіны ЭЗ. Цяпер, для іх, вобразна кажучы, закрытыя літоўская і польская межы. І закрытыя яны беларускімі ўладамі з прычыны цяперашніх палітычных адносінаў Менску з Варшавай і Вільняй.

І гэтым людзям не застаецца іншага выйсьця, як спрабаваць трапіць у ЭЗ праз мяжу з Латвіяй.