Стрыжак: «Мельнікава прапанавала 5000 еўра, але ж хацела ўдзельнічаць у ацэнцы заявак»

Па яго словах, гэта адбылося пасля мінулагодняй канферэнцыі Новай Беларусі, што прайшла ў Вільні.

— Мы ўпершыню ўжывую перасякліся з Анжалікай. Падчас размовы яна прапанавала далучыцца да фінансавання ініцыятыў у межах праграмы BYSOL. Мельнікава прапанавала EUR5000, але ж хацела удзельнічаць у ацэнцы заявак ад ініцыятыў, якія мы прымаем і з Беларусі, і ад структур па-за яе межамі, — расказаў Андрэй Стрыжак.

Ён запэўнівае, што такая практыка ў межах BYSOL немагчымая і «нельга прыйсці з вуліцы з грашыма і атрымаць доступ да заявак».

— EUR5000 у межах праектнай дзейнасці — гэта невялікая сума, дастатковая, хіба, для фінансавання мікрапраекта маленькай ініцыятывы. Мяне троху здзівіла, што пасля напаміну пра справу, Анжаліка паабяцала вярнуцца да яе пазней, але ж больш ніколі не вярнулася. Але ж, так бывае ў грамадскім сектары — ідэі і праекты хутка нараджаюцца і так жа хутка паміраюць нерэалізаванымі, — адзначае Стрыжак.

Ён кажа, што не ведае, ці гэта была праватная ініцыятыва Мельнікавай, ці агульная ад Каардынацыйнай Рады і тая выступала як спікерка.

— Але ж калі, напрыклад, КР нічога ня ведае пра гэтыя грошы, то чые яны маглі быць? — задаецца пытаннем кіраўнік BYSOL. — І калі пафантазаваць, то для спробы атрымаць доступ да заявак, што прыходзяць у BYSOL, і дадзеных пра людзей, што іх падаюць, такая «інвестыцыя» выглядае як цалкам сабе пад'ёмныя траты.